*ایسا کہاں سے لاؤں کہ تجھ سا کہوں جسے! شیخ شمع ولد شیخ احمد کے انتقال پر حافظ عارف خان صدر دارالانصار ہیلپنگ ویلفیئر سوسائٹی کا اظہارِ تعزیت*

عادل آباد، 9،نومبر (عظیم ہند نیوز) (صحافی عمیم شریف)عادل آباد ضلع مستقر کے محلہ خورشید نگر کی ایک مخلص، ہمدرد اور سماجی خدمات کے جذبے سے سرشار شخصیت شیخ شمع ولد شیخ احمد کے انتقال پر حافظ عارف خان، صدر دارالانصار ہیلپنگ ویلفیئر سوسائٹی عادل آباد نے اپنے گہرے رنج و غم کا اظہار کرتے ہوئے مرحوم کی سماجی خدمات کو خراجِ عقیدت پیش کیا۔اپنے تعزیتی بیان میں حافظ عارف خان نے کہا کہ بعض شخصیات اپنی زندگی میں خاموشی کے ساتھ ایسے نمایاں کارہائے خیر انجام دیتی ہیں کہ ان کی رحلت کے بعد ان کی خدمات اور خلوص کی اہمیت مزید شدت سے محسوس ہوتی ہے۔ شیخ شمع مرحوم بھی ایسی ہی ایک مخلص، فعال اور عوام دوست سماجی شخصیت تھے، جنہوں نے اپنی زندگی کو ضرورت مندوں کی مدد اور عوامی مسائل کے حل کے لیے وقف کر رکھا تھا۔انہوں نے کہا کہ مرحوم محض محلہ خورشید نگر کے ایک باشندے نہیں تھے بلکہ غریبوں، بیواؤں، معذوروں، بزرگوں اور پریشان حال خاندانوں کے لیے امید کی ایک کرن تھے۔ سرکاری فلاحی اسکیموں کے ذریعے مستحق افراد کو فائدہ پہنچانے کے لیے ان کی مسلسل جدوجہد قابلِ ستائش اور ناقابلِ فراموش ہے۔حافظ عارف خان نے کہا کہ کسی ضرورت مند کا راشن کارڈ بنوانا ہو، غریب بچیوں کی شادی کے لیے شادی مبارک اور کلیان لکشمی اسکیم سے استفادہ کروانا ہو، مستحق خاندانوں کو ڈبل بیڈ روم مکانات دلوانے کی کوشش ہو، بیواؤں اور معمر افراد کے لیے آسرا پنشن کے حصول کا معاملہ ہو یا کسی غریب مریض کے علاج کے لیے چیف منسٹر ریلیف فنڈ سے مالی امداد حاصل کرنے کی جدوجہد، مرحوم ہر معاملے میں پیش پیش رہتے تھے۔ وہ دوسروں کے مسائل کو اپنا مسئلہ سمجھتے اور ان کے حل کے لیے اپنی تمام تر صلاحیتیں بروئے کار لاتے تھے۔انہوں نے مزید کہا کہ مرحوم کی سماجی زندگی کا سب سے بڑا سرمایہ ان کا بے لوث جذبۂ خدمت تھا۔ انہوں نے اپنے ذاتی مفادات کے بجائے ہمیشہ عوامی بھلائی کو ترجیح دی اور اپنے روابط و صلاحیتوں کو ضرورت مندوں کی مدد کے لیے استعمال کیا۔ بلاشبہ کسی انسان کی زندگی کی سب سے بڑی کامیابی یہی ہے کہ اس کے وجود سے دوسروں کو فائدہ پہنچے اور اس کی رخصتی کے بعد بھی اس کی خدمات لوگوں کے دلوں میں زندہ رہیں۔حافظ عارف خان نے کہا کہ شیخ شمع مرحوم کے انتقال سے محلہ خورشید نگر نے ایک ہمدرد، غم گسار اور بے لوث سماجی خدمت گار کو کھو دیا ہے، جس کی کمی طویل عرصے تک محسوس کی جاتی رہے گی۔ ان کی عوامی خدمات، خلوص اور انسان دوستی ہمیشہ یاد رکھی جائے گی۔

آخر میں انہوں نے بارگاہِ الٰہی میں دعا کی کہ اللہ رب العزت مرحوم کی کامل مغفرت فرمائے، ان کی نیکیوں اور سماجی خدمات کو صدقۂ جاریہ بنائے، قبر کو نور سے منور فرمائے اور جنت الفردوس میں اعلیٰ مقام عطا فرمائے۔ نیز تمام پسماندگان، متعلقین اور سوگوار خاندان کو صبرِ جمیل عطا فرمائے۔ آمین یا رب العالمین۔